«Ընդդիմադիր պատգամավորներից ամենաճիշտ ու արժանապատիվ ձևով իրեն պահեց Վանեցյանը». Ալեն Սիմոնյան
Ազգային ժողովում լրագրողների հետ զրույցում Ազգային ժողովի նախագահ Ալեն Սիմոնյանը նշեց, որ անլուրջ է գնահատում ընդդիմադիր երկու խմբակցությունների այլընտրանքային նիստ հրավիրելը:
Վերջինիս կարծիքով` ընդդիմության այս քայլը չի վնասում Ազգային ժողովի աշխատանքը։
«Չի վնասի, որովհետև Ազգային ժողովը ամենաբարձր լեգիտիմություն ունեցող Ազգային ժողով է ու ընդդիմությունը, կարելի է ասել, ամենացածր լեգիտիմություն ունեցող ընդդիմությունն է մեր պատմության մեջ, չգիտեմ, թող մի հատ էլ այլընտրանքային պետություն հիմնեն», -ասել է Սիմոնյանը:
Ըստ ԱԺ նախագահի՝ ընդդիմադիր պատգամավորները հայտնի են իրենց հայհոյանքներով, ու հանրությունը տալիս է դրա գնահատականը:
«Իսկ մենք կառուցողական ենք եղել, նաև այն հարցում, որ իրենց չենք զրկել մանդատներից, թեև կարող էինք հարցն ուղարկել Սահմանադրական դատարան», - նշեց նա:
Ալեն Սիմոնյանը հայտարարեց, թե ընդդիմադիր պատգամավորներից ամենաճիշտ ու արժանապատիվ ձևով իրեն պահեց Արթուր Վանեցյանը, որը քաղաքական պատասխանատվությունը վերցեց իր վրա:
