ԱՄՆ նախկին նախագահ Դոնալդ Թրամփը Ֆլորիդայի Մար-ա-Լագոյում գտնվող իր կալվածքում պահել է առնվազն 300 գաղտնի փաստաթուղթ։ Գաղտնի նյութերի թվում են Կենտրոնական հետախուզական վարչության, Ազգային անվտանգության գործակալության և Հետաքննությունների դաշնային բյուրոյի փաստաթղթերը։ 

Ինչպես հայտնում է The New York Times-ը, Թրամփը հունվարին մոտ 150 գաղտնի փաստաթուղթ է փոխանցել ԱՄՆ Ազգային արխիվների և փաստաթղթերի վարչությանը։ Թրամփի ներկայացուցիչները մնացած գաղտնի փաստաթղթերը ԱՄՆ արդարադատության նախարարությանը հանձնել են հունիսին, իսկ որոշները առգրավվել են օգոստոսի սկզբին Մար-ա-Լագոյում խուզարկության ժամանակ։

Նշվում է, որ այժմ Սպիտակ տան ներկայացուցիչներն ունեն նյութերի 26 տուփ, որոնք Թրամփը պահել է իր մոտ. դրանց մեջ կա «հույժ գաղտնի» մակագրված մեկ փաթեթը։