Թուրքիան Հայաստանի հետ երկխոսության քայլերը սերտորեն համակարգում է Ադրբեջանի հետ։ Այս մասին հայտնում է Anadolu գործակալությունը՝ հղում անելով Թուրքիայի արտգործնախարար Մևլութ Չավուշօղլուին։ Նրա խոսքով՝ Երևանը պետք է դադարեցնի կարգավորման հարցի ձգձգումը։ 

«Անկարան և Բաքուն այս հարցում անկեղծ են։ Մենք նույնն ենք ակնկալում հայկական կողմից»,- ասել է Չավուշօղլուն։ Ավելի վաղ թուրքական A Haber-ը, վկայակոչելով իրենց երկրի ԱԳՆ պաշտոնական ներկայացուցչին, հայտնել էր, որ Հայաստանի և Թուրքիայի հատուկ ներկայացուցիչներ Ռուբեն Ռուբենյանի և Սերդար Քըլըչի հինգերորդ հանդիպումը երկու երկրների միջև հարաբերությունների կարգավորման նպատակով տեղի կունենա սեպտեմբերին։ Սակայն Հայաստանի ԱԳՆ-ն չի հաստատել այս տեղեկությունը։