Իշխանությունը հրաժարվեց Ալեն Սիմոնյանին ուղեկցող նոր մեքենաներ գնելուց

Այսօր ՀՀ կառավարության հերթական նիստում` առանց քննարկման ու զեկուցման իշխանությունը վերջնականապես հրաժարվեց Ալեն Սիմոնյանին ուղեկցող նոր մեքենաներ գնելուց։

Խնդիրը, ըստ որոշման հիմնավորման, ոչ թե միջոցների խնայողությունն է, այլ այն, որ ԱԺ-ի պահանջած ամենագնացներն այս պահին Հայաստան անհնար է ներկրել։

««Տոյոտա Երևան» ՍՊԸ-ն, պայմանավորված արտաքին գործոններով, մասնավորապես՝ Ռուսաստանի Դաշնությունում տիրող իրավիճակով և կիրառվող պատժամիջոցներով, չի կարողանում ներկրել ՀՀ Ազգային ժողովին անհրաժեշտ տեխնիկական պարամետրերով ավտոմեքենաները։ Ուստի, ՀՀ Ազգային ժողովը նպատակահարմար է համարում ձեռնպահ մնալ վերոնշյալ մեքենաների գնման գործընթացից»,- ասված է որոշման հիմնավորման մեջ։

Արդյունքում, կառավարությունը ուժը կորցրած է ճանաչել ավտոմեքենաների գնման որոշումը և այդ նպատակով հատկացված 54 մլն դրամը կվերադարձնի բյուջե։