Ադրբեջանում մեղադրել են Հայաստանի ընդդիմությանը «սադրիչ մտադրություններ» ունենալու մեջ
Ադրբեջանի Պետական անվտանգության ծառայության ղեկավար, գեներալ-գնդապետ Ալի Նագիևը հայտնել է, թե «Հայաստանի ընդդիմությունը լուրջ փորձեր է անում խաթարելու ադրբեջանա-հայկական հարաբերությունների կարգավորման գործընթացը»։ Այս մասին գրում են տեղի լրատվամիջոցները:
Երեքշաբթի ելույթ ունենալով Ղրղզստանի Չոլպոն-Աթա քաղաքում թյուրքալեզու պետությունների հատուկ ծառայությունների խորհրդաժողովի XXIV նիստում, Նագիևը նշել է, թե որոշ հարևան երկրների տարածքներից մի շարք արմատական շրջանակներ պարբերաբար շարունակում են իրենց գործունեությունը, որն ուղղված է տարածաշրջանում և Ադրբեջանի ներսում կայունությունը և հանգստությունը խաթարելուն:
Ըստ գերատեսչության հաղորդագրության՝ «Հայաստանում ռեւանշիստական ուժերը դեռևս չեն հրաժարվել իրենց սադրիչ մտադրություններից, և որ այս երկրի ընդդիմությունը լուրջ փորձեր է անում խաթարելու ադրբեջանա-հայկական հարաբերությունների կարգավորման գործընթացը»։
