Ջորջիա Մելոնին դիտարկում է Իտալիայում արտահերթ ընտրությունների անցկացումը

Իտալիայի վարչապետ Ջորջիա Մելոնին քննարկում է երկրում հաջորդ համապետական ընտրությունները նախատեսված ժամկետից շուտ՝ ապրիլին կազմակերպելու հնարավորությունը:

Ինչպես հայտնում է Bloomberg գործակալությունը՝ հղում անելով իրավիճակին ծանոթ աղբյուրներին, ընտրությունները կարող են տեղի ունենալ մի քանի ամիս շուտ, քան օրենքով սահմանված 2027 թվականի վերջի վերջնաժամկետն է:

Անանուն մնալու պայմանով խոսած աղբյուրների փոխանցմամբ՝ Մելոնին անհանգստանում է, որ քվեարկության հետաձգումը կարող է հանգեցնել իր աջակցության վարկանիշի անկմանը:

Բացի այդ, գործակալության զրուցակիցները նշել են, որ վարչապետը մտավախություն ունի, որ լիազորությունների ժամկետի ավարտին մոտ ընտրությունների անցկացումը հաջորդ կառավարությանը բավարար ժամանակ չի տա մինչև տարեվերջ հաստատման ենթակա նոր բյուջեի ընդունման համար: