ՄԱԿ-ի Պարենի և գյուղատնտեսության կազմակերպության (FAO) կազմած Պարենի համաշխարհային գների ինդեքսը հունիսին նվազել է 2,3 տոկոսով: FAO-ի գների ինդեքսը նվազում է արդեն երրորդ ամիսը, բայց մնում է 23%-ով ավելի բարձր, քան 2021 թվականի նույն ամսին:

Մասնավորապես՝ հացահատիկի գների ինդեքսը հունիսին նվազել է 4,1 տոկոսով, բայց դեռ բավականին(36 տոկոսով) ավելի բարձր է, քան մեկ տարի առաջ: Այդ թվում՝ ցորենի գները մնում են գրեթե մեկուկես անգամ (48,5%-ով) ավելի բարձր։ Գների նվազումը կապված է Կանադայում ու Ռուսաստանում ցորենի բերքի լավ հեռանկարների, ինչպես նաև Բրազիլիայում, Արգենտինայում և ԱՄՆ–ում եգիպտացորենի բերքահավաքի հետ: Միևնույն ժամանակ, բրնձի գները աճել են բարձր պահանջարկի ու բասմաթի բրնձի սահմանափակ ծավալների պատճառով:

Ձեթի ինդեքսը հունիսին նվազել է 7,6 տոկոսով՝ դրա բոլոր հիմնական տեսակների՝ արմավենու, արևածաղկի, սոյայի գների իջեցման հաշվին: Մասնավորապես՝ սպասվում է արմավենու յուղի արտադրության և արտահանման աճ, այդ թվում՝ Ինդոնեզիայում, որը խոշորագույն արտադրող երկրներից է։ Իջնում են արևածաղկի ձեթի գները, քանի որ դրա նկատմամբ չափազանց բարձր գների պայմաններում պահանջարկը նվազել է։

Շաքարավազի գները մայիսի համեմատ նվազել են 2,6 տոկոսով (փետրվարից հետո ամենացածր մակարդակը)։ Մասնավորապես՝ Բրազիլիայում շաքարի արտադրության ու այնտեղից արտահանման աճին նպաստել է դոլարի նկատմամբ ռեալի փոխարժեքի նվազումը, ինչպես նաև էթանոլի գների նվազումը (որի համար օգտագործվում է շաքարավազի եղեգի մի մասը): Գների նվազումը չափավոր է եղել այն պատճառով, որ այս տարի եղեգի բերքի հեռանկարները դեռ պարզ չեն։