«1000 օր․ Ազատ արձակեք հայ պատանդներին հիմա». Կոնգրեսում կհնչի կոչ

Հայ դատի Ամերիկայի հանձնախմբի նախաձեռնությամբ ԱՄՆ Կոնգրեսում հունիսի 23-ին նախատեսվում է մամուլի ասուլիս՝ նվիրված Ադրբեջանի կողմից Արցախի ռազմաքաղաքական ղեկավարության, ռազմագերիների և քաղաքացիական պատանդների պահման 1000-րդ օրվան։

Ասուլիսը հրավիրում են Կոնգրեսի Հայկական հարցերով խմբի փոխնախագահ Բրեդ Շերմանը, ինչպես նաև կոնգրեսականներ Թոմ ՄաքՔլինթոքը, Ջուդի Չուն և Լորա Ֆրիդմանը։ Հայ դատի Ամերիկայի հանձնախմբի անունից մասնակցելու է Արամ Համբարյանը։

Նախաձեռնությունը տեղի է ունենում այն պահին, երբ ԱՄՆ Ներկայացուցիչների պալատի արտաքին հարաբերությունների հանձնաժողովը քննարկում է Բրեդ Շերմանի օրենսդրական առաջարկը, որով պահանջվում է Ադրբեջանի կողմից հայ ռազմագերիների և պատանդների անհապաղ և առանց նախապայմանների ազատ արձակումը։

Քննարկվելու են նաև 2027 ֆինանսական տարվա Ազգային պաշտպանության լիազորման ակտի և Ազգային անվտանգության ու արտաքին գործառնությունների հատկացումների շրջանակում ներկայացված հայանպաստ օրենսդրական առաջարկները։