Մշակութային յուրացում չէ, այլ հայկական հետքի վերացում․ Պետրոսյանը՝ Ադրբեջանի նախաձեռնությունների մասին

Ադրբեջանի Գյոյգյոլի շրջանում անցկացված «Արևմտյան Ադրբեջանի ժառանգությունը․ վերադարձ պատմական արմատներին» խորագրով փառատոնի ընթացքում կրկին հնչել են վիճահարույց հայտարարություններ՝ կապված Հայաստանի տարածքի և մշակութային ժառանգության հետ։

Միջոցառման ընթացքում ցուցադրվել են Հայաստանի տարբեր վայրերի պատկերներ, այդ թվում՝ Երևանի Հանրապետության հրապարակից և Վայոց ձորի Նորավանքից արված լուսանկարներ, որոնք ներկայացվել են որպես այսպես կոչված «Արևմտյան Ադրբեջանի» մաս։ Օգտագործվել է նաև Հայաստանի քարտեզը՝ ներկայացված նույն ձևակերպմամբ, ինչպես նաև հնչել է հայկական ժողովրդական «Քոչարի» պարային երաժշտությունը՝ առանց հայկական ծագման հիշատակման։

Փառատոնի շրջանակում ադրբեջանցի պաշտոնյաները և «Արևմտյան Ադրբեջանի համայնքի» ներկայացուցիչները խոսել են «վերադարձի իրավունքի» մասին՝ ընդգծելով նման նախաձեռնությունները նաև ՀՀ տարածքներում անցկացնելու հեռանկարը։

Միջադեպին անդրադարձել է մշակութաբան Համլետ Պետրոսյանը՝ MediaHub-ի հետ զրույցում նշելով, որ իր գնահատմամբ՝ տեղի ունեցողը ոչ թե մշակութային յուրացում է, այլ հայկական հետքի հետևողական վերացման քաղաքականություն։

Նրա խոսքով՝ նման գործընթացները ունեն համակարգված բնույթ և ուղեկցվում են պատմամշակութային ժառանգության վերաիմաստավորմամբ ու քաղաքական նպատակներով օգտագործմամբ։

Պետրոսյանը նաև կարծիք է հայտնել, որ միջազգային արձագանքը նման զարգացումներին սահմանափակ է և էական փոփոխություններ չի կարող բերել ընթացող գործընթացներում։

Մանրամասները՝ https://mediahub.am/post/syyox6s3zl5gba76