Աշխարհի առաջատար համալսարանների փիլիսոփաները ժամանել են Երևան. Աննա Հակոբյան

Հայաստանի ամերիկյան համալսարանում ընթացող «Վստահություն և հույս ճգնաժամերի ժամանակ» միջազգային կոնֆերանսին մասնակցելու նպատակով Երևան են ժամանել աշխարհի առաջատար համալսարանների փիլիսոփայության դեպարտամենտների պրոֆեսորները:

Այս մասին Ֆեյսբուք սոցիալական ցանցի իր էջում տեղադրված տեսանյութի միջոցով հայտնել է ՀՀ վարչապետի տիկին, «Իմ քայլը» հիմնադրամի գործադիր տնօրեն Աննա Հակոբյանը՝ հավելելով, որ արդեն առիթ է ունեցել զրուցելու մասնակիցներից մի քանիսի հետ և պարզելու նրանց տպավորությունները Հայաստանի ու Երևանի վերաբերյալ:

«Երևանում են նաև փիլիսոփաների համաշխարհային ֆեդերացիայի ներկայացուցիչները, որոնք այդ կազմի մեջ են մտնում, նախապատրաստական աշխատանքներ են տանելու նաև մյուս տարի Ճապոնիայում անցկացվելիք մեկ այլ շատ կարևոր կոնֆերանսի համար, ինչը, իհարկե, պարզապես հիասքանչ է մեզ համար»,- ասաց նա և այս համատեքստում ներկայացրեց նաև «Կրթվելը նորաձև է» համապետական շարժման ռազմավարական ծրագրի նպատակը: