Արտաշատում մսամթերքի արտադրամասի գործունեություն է կասեցվել խախտումների պատճառով․ ՍԱՏՄ

Սննդամթերքի անվտանգության տեսչական մարմնի իրականացրած ստուգման արդյունքում Արտաշատում գործող անհատ ձեռնարկատեր Գևորգ Աղազարյանին պատկանող մսամթերքի արտադրամասում արձանագրվել են մի շարք խախտումներ։

Տեսչական մարմնի տվյալներով՝ խախտվել են «Սննդամթերքի անվտանգության մասին» Մաքսային միության տեխնիկական կանոնակարգի պահանջները։

Մասնավորապես՝ արտադրական շինությունում չեն բացառվել հումքի և պատրաստի սննդամթերքի, ինչպես նաև մաքուր և աղտոտված հոսքերի խաչաձևումները, չեն ապահովվել փաթեթավորման նյութերի ու սննդամթերքի պատշաճ պահպանման պայմանները, իսկ արտադրամասում հայտնաբերվել են արտադրության համար չնախատեսված նյութեր և պարագաներ։

Բացի այդ, պատերը չեն համապատասխանել հիգիենիկ պահանջներին, սարքավորումները չեն գտնվել նորոգ վիճակում, իսկ սննդի արտադրամասը չի ունեցել անձնակազմի համար նախատեսված հանդերձարան։

ՍԱՏՄ-ի որոշմամբ՝ արտադրամասի գործունեությունը կասեցվել է, և սահմանվել է վերջնաժամկետ՝ հայտնաբերված խախտումները վերացնելու համար։