«Պուտինի հետ այլևս հոկեյ չէի խաղա»․ Ֆինլանդիայի նախագահի հայտարարությունն ու Կրեմլի արձագանքը
Ֆինլանդիայի նախագահ Սաուլի Նիինիստոն այլևս չի պատրաստվում հոկեյ խաղալ իր ռուս գործընկեր Վլադիմիր Պուտինի հետ: Այս մասին նա ասել է իտալական La Reppublica թերթին տված հարցազրույցում։
«Ոչ, ես այլևս չէի խաղա Պուտինի հետ», - նշել է նա:
Կրեմլից արձագանքը չի ուշացել՝ Նիինիստոյի ասածին արձագանքել է ՌԴ նախագահի մամուլի քարտուղար Դմիտրի Պեսկովը՝ շեշտելով, որ Վլադիմիր Պուտինը բավականաչափ գործընկերներ ունի հոկեյ խաղալու համար, փոխանցում է rsport.ria.ru-ն։
«Իրականում սպորտը և այնպիսի թիմային սպորտաձևեր, ինչպիսին է հոկեյը, նպաստում են փոխադարձ վստահության ձևավորմանը: Եվ այս տեսանկյունից, մի ժամանակ դա շատ, շատ լավ, դրական պրակտիկա էր պարոն Նիինիստոյի նախագահության հենց սկզբում: Դե, հիմա նա ասում է, որ չի խաղալու: Պուտինն իր թիմի, ընդհանուր թիմի անդամների պակաս չունի: Հետևաբար, Պուտինը հոկեյ խաղում է, պարբերաբար դա անում է», - ասել է Պեսկովը:
Հայտնի է, որ 2012 թվականին բանակցություններից հետո Նիինիստոն և Պուտինը Լենինգրադի մարզում մասնակցել են Ռուսաստանի և Ֆինլանդիայի հավաքականների հոկեյի հանդիպմանը։ Այն ժամանակ Ֆինլանդիայի նախագահը որոշել է խաղալ Ռուսաստանի հավաքականի կարմիր համազգեստով։
