«Հայաստանի համար սա առաջնահերթություն է». Փաշինյանը` ԵԱՏՄ միջկառավարական խորհրդի նիստին
ՀՀ վարչապետ Նիկոլ Փաշինյանը Եվրասիական միջկառավարական խորհրդի նիստում հայտարարեց, որ ժամանակակից տնտեսական մարտահրավերների համատեքստում կարևորագույն խնդիրներից մեկը մնում է ԵԱՏՄ երկրների պարենային անվտանգության ապահովումը:
«Ներկայումս, օբյեկտիվ պատճառներով, գյուղատնտեսական ընդհանուր շուկայում որոշակի տեսակների գյուղատնտեսական ապրանքների մատակարարման սահմանափակումներ կան, ինչը կարող է բացասաբար ազդել մեր երկրներում գյուղատնտեսության կայուն գործունեության և, ընդհանրապես, Միության պարենային մատակարարման վրա», - ասաց Փաշինյանը։
Վերջինիս խոսքով՝ Միության անդամ երկրները պետք է կոլեկտիվ հիմունքներով հակազդեն ռիսկերին՝ նվազագույնի հասցնելով սննդի պակասի հավանականությունը։
Փաշինյանըն նաև նշեց, որ բիզնեսի առջև ծառացած խոչընդոտների զգալի մասը գործունեության միասնական, համակարգված, ներդաշնակեցված կանոնների բացակայության արդյունքն է։
«Կարևոր եմ համարում նաև ալկոհոլի շուկայի կարգավորման հարցը։ Ընդհանուր նպատակների և սկզբունքների, ընդհանուր կարգավորող միջոցառումների հաստատումը կարող է նպաստել ընդհանուր շուկայի ստեղծմանը` առանց փոխադարձ առևտրում խտրական սահմանափակումների և բացառությունների: Հայաստանի համար սա առաջնահերթություն է և ունի արտահանման լայն հնարավորություններ», -ասաց վարչապետը։
