Դանիայի վարչապետը հայտնել է, որ Ուկրաինան զենքի լրացուցիչ խմբաքանակ կստանա
Դանիայի կառավարությունը զենքի լրացուցիչ խմբաքանակ կուղարկի Ուկրաինա։ Այս մասին հինգշաբթի հայտարարել է սկանդինավյան երկրի վարչապետ Մետե Ֆրեդերիկսենը TV 2-ին տված հարցազրույցում, փոխանցում է ՏԱՍՍ-ը։
«Մենք մտադիր ենք էլ ավելի շատ զենք ուղարկել Ուկրաինա, սա ամենաանհրաժեշտն է»,- ասել է վարչապետը, ով այցով գտնվում է Կիևում։ Նա չի հստակեցրել, թե որ զինատեսակները կհանձնվեն ուկրաինական կողմին։
Հեռուստաալիքի տվյալներով՝ օրվա ընթացքում Դանիայի կառավարության ղեկավարը կհանդիպի Իսպանիայի վարչապետ Պեդրո Սանչեսի և Ուկրաինայի նախագահ Վլադիմիր Զելենսկու հետ։ Ֆրեդերիկսենը սկանդինավյան երկրների ղեկավարության ներկայացուցիչներից առաջինն է, ով այցելել է Ուկրաինա՝ փետրվարին ռուսական օպերացիայի մեկնարկից հետո։
Ավելի վաղ Դանիան Կիև է ուղարկել 2700 շարժական հակատանկային համակարգ։ Դանիայի ոստիկանությունը երեքշաբթի օրը հայտնել է, որ Կեգե նավահանգիստը չորեքշաբթի օրվանից կհայտարարվի «ժամանակավոր ռազմական գոտի»։ Տարածքը կօգտագործվի Լատվիա ռազմական տեխնիկայի և տեխնիկայի տեղափոխման համար, եթե թագավորության խորհրդարանը աջակցի այնտեղ 800 հոգանոց գումարտակ ուղարկելուն։
Դանիայի իշխանությունները նույնպես հայտարարել են, որ պետք է օգնեն վերականգնել Ուկրաինան։
