Մոսկվան սառնասրտորեն կպատասխանի պատժամիջոցներին. ՌԴ ԱԳՆ

«Ռուսաստանը չպետք է յուրաքանչյուր կոնկրետ դեպքում պատժամիջոցներին հայելային պատասխան տա, Մոսկվան սառնասրտություն կցուցաբերի Միացյալ Նահանգների դեմ պատասխան միջոցներ մշակելիս»,-ասել է ՌԴ արտաքին գործերի նախարարի տեղակալ Սերգեյ Ռյաբկովը, փոխանցում է «ՌԻԱ Նովոստի»-ն: 

«Մենք չպետք է կորցնենք մեր գլուխը, մենք պետք է սառնասրտություն դրսևորենք պատասխան պատժամիջոցներ մշակելիս: Մենք, իմ կարծիքով, չպետք է հայելային կերպով գործենք յուրաքանչյուր կոնկրետ դեպքում»,- ասել է Ռյաբկովը ռուսական «Առաջին ալիք»-ի եթերում։ 

ԱՄՆ-ի դեմ ռուսական պատժամիջոցների ցուցակները պատրաստ են և շուտով կհրապարակվեն։ «Ռուսաստանը ժամանակակից, ուժեղ պետություն է, վստահ է իր հնարավորություններին, իրացնում է իր ներուժը՝ լինելով բազմաբևեռ աշխարհի անբաժանելի մասը: Մենք կաշխատենք նպատակաուղղված, եռանդուն և կենտրոնացած այն բանի վրա, որպեսզի խուսափենք ԱՄՆ ցանկացած պատժամիջոցի բացասական ազդեցությունից: Իսկ դրա հնարավորությունները կան»,- ասել է նա։