Ի՞նչ են քննարկել Արարատ Միրզոյանն ու Մևլութ Չավուշօղլուն. կողմերը կիսվել են հանդիպման տպավորություններով

Այսօր Անթալիայում տեղի է ունեցել Հայաստանի և Թուրքիայի արտաքին գործերի նախարարներ Արարատ Միրզոյանի եւ Մևլութ Չավուշօղլուի հանդիպումը: Հանդիպումից հետո տեսակետներով են կիսվել երկու կողմերն էլ: Արարատ Միրզոյանը նշել է, որ  հրավերը բավականին դրական ուղերձ էր, և անհրաժեշտ է համարել նույն դրական կերպով արձագանքել այդ ուղերձին: 

«Մեր հանդիպման ընթացքում վերահաստատել ենք երկու կողմի պատրաստակամությունը` շարունակել կարգավորման, նորմալացման գործընթացը` հարաբերությունների հաստատման և սահմանների բացման նպատակով առանց որևէ նախապայմանի, և մեր երկու ներկայացուցիչներն աշխատում են այդ ուղղությամբ», – մանրամասնել է նա: Հայաստանի արտգործնախարարը հույս է հայտնել հայ-թուրքական բանակցություններում դրական արդյունքներ տեսնել մոտ ապագայում: 

Իր հերթին Թուրքիայի արտգործնախարարը շնորհակալություն է հայտնել  Արարատ Միրզոյանին՝  հրավերն ընդունելու և Անթալիայում դիվանագիտական համաժողովին մասնակցելու համար: «Շատ արդյունավետ և կառուցողական հանդիպում ունեցանք: Գիտեք, որ հարաբերությունների կարգավորման համար գործընթաց ենք սկսել: Նախագահ Էրդողանի և Փաշինյանի փոխադարձ դրական ուղերձներից հետո հատուկ ներկայացուցիչներ նշանակեցինք: Բանագնացները երկու հանդիպում ունեցան Մոսկվայում և Վիեննայում: Քննարկել են և շարունակում են քննարկել լրիվ կարգավորմանը ուղղված քայլերը»,- ասել է Չավուշօղլուն։