ԱՄՆ-ի և բրիտանական հետախուզական ծառայությունները դեռ հոկտեմբերին հայտնել են, որ պատերազմ է ծրագրվում. Le Monde

Ֆրանսիական ազդեցիկ Le Monde թերթը, հղում անելով ֆրանսիական դիվանագիտական ​​աղբյուրներին, գրում է, որ ԱՄՆ-ի և Մեծ Բրիտանիայի հետախուզությունները դեռ աշնանն են իմացել «Ուկրաինա ներխուժելու Ռուսաստանի նախապատրաստության մասին, և այդ տեղեկատվությամբ կիսվել են իրենց դաշնակիցների հետ, ինչպիսիք են Գերմանիան, Ֆրանսիան և Իտալիան:
 

Բայց դաշնակիցները, ըստ թերթի, թեև չէին կասկածում ռազմական պատրաստության շուրջ տեղեկության հարցում, այնուամենայնիվ այն մեկնաբանել են ոչ թե որպես Վլադիմիր Պուտինի կողմից իրական պատերազմի նախապատրաստում, այլ որպես նրա կողմից Արևմուտքից զիջումներ կորզելու փորձ։
 

Արևմտյան մամուլում Ուկրաինա ներխուժման նախապատրաստության մասին առաջին հաղորդումները, հիմնված հետախուզական աղբյուրների վրա, հայտնվել են նոյեմբերի սկզբին:
 

Դեկտեմբերին ԱՄՆ Ազգային հետախուզության տնօրեն Ավրիլ Հեյնսը վստահորեն ասում էր դաշնակիցներին, որ Պուտինը վերջնական որոշում է կայացրել հարձակվել Ուկրաինայի վրա, և նրա հակառակ հայտարարությունները նպատակ ունեն միայն խաբել և ժամանակ շահել, գրում է Le Monde-ը։

Մայրցամաքային Եվրոպայի հետախուզական ծառայությունները որոշ ժամանակ կասկածում էին դրանում։
 

Իրավիճակի գնահատման տարբերությունները հանգեցրին նրան, որ Միացյալ Նահանգները և Մեծ Բրիտանիան սկսեցին ինտենսիվ մարզել ուկրաինական բանակը և մեծացնել զենքի մատակարարումը, մինչդեռ Գերմանիան, Ֆրանսիան և Իտալիան դա չէին անում մինչև պատերազմի մեկնարկը։