Ո՞ր երկրներն են փակում են իրենց օդային տարածքը ռուսական ինքնաթիռների համար․ թարմացված

Գերմանիան Մոսկվայի ժամանակով ժամը 17:00-ից փակում է իր օդային տարածքը ռուսական ինքնաթիռների համար: Այս մասին հայտնել է  Գերմանիայի տրանսպորտի նախարարությունը, գրում է ՏԱՍՍ-ը: 

ՏԱՍՍ գործակալության հաղորդմամբ՝ երեկ Իսլանդիայի արտգործնախարար Թուրդիս Կոլբրուն Գիլֆադոտտիրը իր թվիթերյան օգտահաշվում հայտնել է, որ Իսլանդիան կփակի իր օդային տարածքը ռուսական ինքնաթիռների համար: 

«Իսլանդիան որոշել է փակել իր օդային տարածքը ռուսական օդային տրանսպորտի համար՝ ի նշան Ուկրաինայի հետ համերաշխության»,- գրել է նա։ 

Շվեդիայի ԵՄ հարցերով նախարար Հանս Դալգրենը կիրակի շվեդական ռադիոյին տված հարցազրույցում ասել է, որ Շվեդիան ևս կփակի օդային տարածքը ռուսական ինքնաթիռների համար, հայտնում է ՏԱՍՍ-ը: 

«Շվեդիան պատրաստվում է փակել իր օդային տարածքը ռուսական ինքնաթիռների համար», - ասել է նա և հավելել. «Ամենաարդյունավետ միջոցը կլինի ԵՄ երկրների կողմից համատեղ որոշում կայացնելը: Շվեդիան այժմ պնդելու է դադարեցնել ռուսական թռիչքները ԵՄ ներսում»: 

Դանիան կփակի իր օդային տարածքը ռուսական ինքնաթիռների համար: Այս մասին իր թվիթերյան օգտահաշվում գրել է Դանիայի արտաքին գործերի նախարար Յեպպե Կոֆոդը՝ նշելով, որ Կոպենհագենը կպահանջի համաեվրոպական օդային տարածքը փակել Ռուսաստանի համար: 

Ավստրիայի կլիմայի պաշտպանության, շրջակա միջավայրի, էներգետիկայի, տրանսպորտի, նորարարության և տեխնոլոգիաների նախարար Լեոնորա Գևեսլերը թվիթերյան իր օգտահաշվում գրել է, որ  Ավստրիան կփակի իր օդային տարածքը բոլոր ռուսական ինքնաթիռների համար: 

Բելգիայի իշխանությունները ևս որոշել են փակել երկրի օդային տարածքը ռուսական ավիաընկերությունների համար՝ Ուկրաինայում Ռուսաստանի Դաշնության ռազմական գործողության պատճառով։ Այս մասին կիրակի օրը հայտարարել է թագավորության վարչապետ Ալեսքանդեր դե Կրոուն։ 

«Բելգիան որոշել է փակել իր օդային տարածքը բոլոր ռուսական ավիաընկերությունների համար»,- գրել է նա իր թվիթերյան օգտահաշվում: 

Ավելի վաղ նման որոշումներով հանդես էին եկել Լիտվան, Լատվիան, Էստոնիան, Սլովենիան, Ռումինիան, Բուլղարիան, Լեհաստանը, Չեխիան և Միացյալ Թագավորությունը։