Բայդենը երրորդ համաշխարհային պատերազմի սկիզբն անվանել է Ռուսաստանի դեմ պատժամիջոցների այլընտրանք

ԱՄՆ նախագահ Ջո Բայդենը հայտարարել է, որ Ուկրաինայի իրադարձությունների հետ կապված Ռուսաստանի դեմ արևմտյան լայնածավալ պատժամիջոցների ներդրման այլընտրանքը կլինի երրորդ համաշխարհային պատերազմի սկիզբը։ Այս մասին գրում է RT-ն:

«Դուք ունեք երկու տարբերակ՝ սկսել երրորդ համաշխարհային պատերազմ և ֆիզիկապես պատերազմել Ռուսաստանի հետ, կամ ապահովել, որ մի երկիր, որն այդքան դաժանորեն խախտում է միջազգային իրավունքը, վճարի դրա գինը», - ասել է Բայդենը։
 

Նրա խոսքով՝ Ուկրաինայի իրադարձությունները Ռուսաստանի համար հետևանքներ կունենան «ոչ միայն մոտ, այլև հեռավոր ապագայում»։
 

Ավելի վաղ ԱՄՆ նախագահի ազգային անվտանգության հարցերով խորհրդականի տեղակալ Դյուլիպ Սինգհը հայտարարել էր, որ ԱՄՆ իշխանությունները ակնկալում են ռուբլու թուլացումը և սահմանած պատժամիջոցների արդյունքում նրա գնողունակության նվազում:
 

Ջո Բայդենը նաեւ նշել է, որ Ռուսաստանի դեմ ԱՄՆ-ի նոր պատժամիջոցներն ավելի շատ հետեւանքներ կունենան, քան SWIFT համակարգից անջատվելը։