ԱՄՆ-ն պատրաստ է երկխոսել Հյուսիսային Կորեայի հետ առանց նախապայմանների. Սպիտակ տուն
Սպիտակ տունը պատրաստ է երկխոսել Հյուսիսային Կորեայի հետ առանց նախապայմանների եւ չունի թշնամական մտադրություններ այդ երկրի նկատմամբ: Այդ մասին փետրվարի 13-ին հայտարարել է ԱՄՆ պետքարտուղար Էնթոնի Բլինքենը, գրում է Իզվեստիա-ն:
«Ցանկանում եմ ընդգծել, որ մենք չունենք թշնամական մտադրություններ Հյուսիսային Կորեայի նկատմամբ: Մենք դեռեւս պատրաստ ենք երկխոսել առանց նախապայմանների, եթե Փհենյանն ընտրի այդ ուղին»,-նշել է ամերիկյան դիվանագիտության ղեկավարը, որի ելույթը հեռարձակվել է ԱՄՆ Պետդեպարտամենտի YouTube-յան ալիքում:
Բլինքենի կարծիքով՝ Հյուսիսային Կորեան դարձյալ կարող է իրականացնել սադրանքներ ուրիշ տարածաշրջաններում տեղի ունեցող իրադարձությունների ֆոնին՝ նկատի ունենալով Փհենյանի կողմից հրթիռային արձակումները:
«Մեզ բոլորիս պարզ է, որ Հյուսիսային Կորեան գտնվում է սադրանքների փուլում»,-ընդգծել է նա:
