Բայդենը դաշնակիցներին հայտնել է Ուկրաինայի վրա ՌԴ-ի հարձակման ժամկետը․ Politico
ԱՄՆ նախագահ Ջո Բայդենը փետրվարի 11-ին ԵՄ-ի և ՆԱՏՕ-ի մի շարք երկրների առաջնորդների հետ բանակցությունների ընթացքում հայտնել է նրանց, որ Ուկրաինայի վրա ՌԴ-ի հարձակումը կսկսվի փետրվարի 16-ին։
Այս մասին գրում է Politico պարբերականը։
Այսպիսով, պարբերականը, հղում անելով բարձրաստիճան պաշտոնյաներին, հայտնում է, որ Վաշինգտոնի տեղեկություններով ռուսական զորքերի ներխուժմանը կնախորդեն հրթիռային հարվածները և կիբերհարձակումները։
Ինչպես նշում է թերթը, Եվրոպայում կասկածամտությամբ են վերաբերվել ամերիկյան կողմի հայտարարությանը։ «ԵՄ-ում նախկինի պես հրաժարվում են հավատալ դրան։ Դա այնպիսի սխալ կլինի․․․։ Պատերազմը թանկ կարժենա»,-թերթը մեջբերում է աղբյուրներից մեկին։
Միևնույն ժամանակ, բանակցությունների մասնակիցները համակարծիք են եղել, որ գլխավորը հիմա միասնության պահպանումն է ու Մոկսվայի դեմ պատժամիջոցներին պատրաստ լինելը։
Նշենք, որ գերմանական Der Spiegel պարբերականը նույնպես հայտնում է, որ Բայդենը բանակցությունների ժամանակ ՌԴ զորքերի Ուկրաինա ներխուժման հավանական ամսաթիվ է անվանել փետրվարի 16-ը։ Դաշնակիցներին ներկայացվել են բազմաթիվ մանրամասներ՝ այդ հարձակման նախապատրաստության, երթուղիների մասին։ Կողմերը պայմանավորվել են առաջիկա օրերին կրկնապատկել դիվանագիտական ջանքերը՝ Ուկրաինայի շուրջ իրադրության կարգավորման հարցով։
