Ռուս գեղասահորդուհի Վալիևայի կասկածելի դոպինգ թեստի վերաբերյալ հրապարակումները՝ սպեկուլյացիա են. ՄՕԿ

ՄՕԿ-ի պաշտոնական ներկայացուցիչ Մարկ Ադամսը սպեկուլյացիա եւ բամբասանքներ է անվանել ռուս գեղասահորդուհի Կամիլա Վալիևայի կասկածելի դոպինգ թեստի վերաբերյալ մամուլում հայտնված հրապարակումները։ 

«Դուք հասկանում եք, որ ես չեմ մեկնաբանի այս թեմայով շահարկումները։ Այո, երեկ որոշ իրավական իրավիճակներ են ստեղծվել, բայց դա մեկնաբանելը տեղին չէ։ Դոպինգի հավանական դեպքը նույնպես ենթադրություն է»,- այսօր կայացած ասուլիսում ասել է Ադամսը: Ռուս գեղասահորդուհի Կամիլա Վալիեւան երեկ մարզումները բաց թողնելուց հետո, այսօր նորից գնացել է մարզվելու։ 

Հիշեցնենք՝  երեկ լուրեր տարածվեցին, թե Պեկինի 24-րդ ձմեռային Օլիմպիական խաղերում գեղասահքի թիմային չեմպիոնի կոչումը նվաճած Ռուսաստանի հավաքականի անդամ, 15-ամյա Կամիլա Վալիեւան օգտագործել է արգելված խթանիչ։ Սրա պատճառով էլ Ռուսաստանի գեղասահքի հավաքականի պարգեւատրման արարողությունը տեղի չի ունեցել: Պեկինում շարունակվող 24-րդ ձմեռային Օլիմպիական խաղերում փետրվարի 10-ին կվիճարկվի մեդալների 8 հավաքածու։