Ո՞ւմ թեկնածություններ է քննարկել ընդդիմությունը՝ նախագահի պաշտոնում. «Հրապարակ»

«Լրատվականը  հետաքրքրվել է ՝ այնուամենայնիվ, ո՞ւմ թեկնածություններն է քննարկել խորհրդարանական ընդդիմությունը՝ հանձին «Հայաստան» դաշինքի, ՀՀ նախագահի պաշտոնի համար։ Հայտնել են, որ մեծ թվով անձանց են քննարկել։ Նախ առաջարկել են Ռոբերտ Քոչարյանի թեկնածությունը, ով հրաժարվել է առաջադրվել։ Ապա ինքնառաջադրվել է Էդգար Ղազարյանը՝ շեշտելով առաջադրման կարևորությունը և հայտնելով իր պատրաստակամությունը՝ աջակցել ընդդիմության ցանկացած թեկնածուի։ 

Ապա ևս երկու թեկնածու է քննարկվել՝ թուրքագետ, գիտությունների դոկտոր Ռուբեն Մելքոնյանի և ԱԺ նախկին փոխնախագահ Արա Սահակյանի թեկնածությունները։ Վերջինիս թեկնածությունը դրական է դիտվել, քանզի Վահագն Խաչատրյանի դեպքում նա լավ մրցակից կարող էր լինել՝ երկուսն էլ Լևոն Տեր-Պետրոսյանի շրջանի գործիչներ են, երկուսն էլ՝ կենսագրություն ունեցող, բարձր պաշտոններ զբաղեցրած։ Սահակյանը՝ նաև որպես ինտելեկտուալ և ինտելիգենտ մարդու կերպար»։