«Օմիկրոնը կլինի գրիպի նման սովորական վիրուս․ մարդիկ կհիվանդանան, կլավանան»․ Նարեկ Զեյնալյան
«Մեծամասամբ օմիկրոն տեսակի շտամն է, որովհետև այն ունի բավականին մեծ տարածվածության ցուցանիշ, բայց դրան զուգահեռ, բարեբախտաբար, մահաբերության ցուցանիշը խիստ ցածր է՝ այլ շտամների համեմատ»,- այսօր՝ լրագրողների հետ զրույցում, անդրադառնալով Հայաստանում կորոնավիրուսի դեպքերի թվին, ասաց առողջապահության և սոցիալական հարցերի մշտական հանձնաժողովի նախագահ, ՔՊ-ական պատգամավոր Նարեկ Զեյնալյանը: «Եթե նկատել եք, այդքան բարձր հիվանդացության ցուցանիշի դեպքում մահվան թվերը եզակի են: Ըստ էության, մենք գնում ենք այնպիսի իրավիճակի, որ սա կլինի սովորական շրջանառվող վիրուս, ինչպիսին է գրիպի սեզոնային վիրուսը: Վստահ եմ, որ կգնա դրան, մարդիկ կհիվանդանան, կլավանան՝ սովորական հարբուխի տեսքով, և հոսպիտալացման կարիք մեծ մասամբ չի լինի»,- նշեց Զեյնալյանը: |
