«Արևմուտքը միասնական է, ՌԴ-ի համար գինը շատ բարձր կլինի, եթե հարձակվի Ուկրաինայի վրա». Մակրոն

 Ֆրանսիայի նախագահ Էմանուել Մակրոնը hայտարարել է, որ Ֆրանսիայի և Գերմանիայի միջև կա «շատ ամուր միասնություն»՝ Ռուսաստան-Ուկրաինա անվտանգության ճգնաժամի շուրջ լարվածությունը թուլացնելու հարցում, hայտնում է Euronews-ը: 

Աասուլիսի ժամանակ Մակրոնը հայտարարել է նաև, որ «Ռուսաստանի` Ուկրաինայի վրա հարձակման դեպքում պատասխան կլինի, և դրա գինը շատ բարձր կլինի»: 

«Մենք միաժամանակ պատրաստում ենք ընդհանուր արձագանքն ու պատասխանը հարձակման դեպքում»,- ընդգծել է նա՝ պնդելով, որ Արևմուտքն ամբողջովին միասնական է և կրկնել` լարվածությունը թուլացնել է պետք։ 

Մակրոնը հաստատել է, որ ուրբաթ հեռախոսազրույց է ունենալու ՌԴ նախագահ Վլադիմիր Պուտինի հետ։ Կրեմլը ևս հայտարարել է, որ զրույցը կկայանա։ Ֆրանսիայի նախագահն ասել է, որ ցանկանում է առաջիկա մի քանի օրվա ընթացքում առաջարկել «ապաէսկալացիայի ճանապարհային քարտեզ»: Իսկ Գերմանիայի կանցլերը, անդրադառնալով հարցին`  արդյոք  Բեռլինը հրաժարվո՞ւմ է զենք ուղարկել Ուկրաինային, պատասխանել է`  երկիրը գործում է սկզբունքային տեսանկյունից, որը, բնականաբար, «բխում է այս վերջին տարիների և տասնամյակների զարգացումից», ինչը կապված է Երկրորդ համաշխարհային պատերազմի համար նրա պատասխանատվության հետ: