Եվրահանձնաժողովը գազի թանկացման պատճառներից մեկն է անվանել

«Աշխարհաքաղաքական լարվածությունը գազի թանկացման պատճառներից մեկն է»-, հայտարարել է եվրահանձնակատար Քադրի Սիմսոնը ԵՄ էներգետիկայի նախարարների ոչ պաշտոնական հանդիպման արդյունքներով հրավիրված մամուլի ասուլիսում, հաղորդում է ՌԻԱ նովոստին։ 
Նրա կարծիքով՝ ներկա շրջանը կարևոր է համայնքի էներգետիկայի համար։ «Կարճաժամկետ հեռանկարում մենք բախվում ենք էներգակիրների անսովոր բարձր գների հետ, մի միտում, որը սրվում է աշխարհաքաղաքական լարվածությամբ», – ասում է Սիմսոնը, որը պատասխանատու է ԵՀ-ում էներգետիկայի համար: 
Ինչպես նշել է եվրահանձնակատարը, վերջին տարիներին աշխարհում գազի գները հասել են պատմական բարձր ցուցանիշների, ինչը անուղղակիորեն ազդել է Եվրամիության սակագների վրա, ինչի հետևանքով սպառողները և արդյունաբերությունը բախվել են հաշիվների վճարման դժվարությունների: 
Նա հավելել է, որ Եվրամիությունը 21 միլիարդ եվրոյի չափով աջակցության միջոցներ է ընդունել սպառողներին աջակցելու համար։ 
Ուրբաթ օրը սակարկությունների ավարտին Եվրոպայում գազի ֆյուչերսների գները հատել են հազար խորանարդ մետրի դիմաց 900 դոլարի շեմը։ Հոլանդական TTF ինդեքսի մոտակա ֆյուչերսների արժեքը առուվաճառքի բացման ժամանակ մի փոքր գերազանցել է 880 դոլարը։ Դեկտեմբերի վերջին գնանշումները հասել են հազար խորանարդ մետրի դիմաց 2190,4 դոլարի պատմական առավելագույնին, որից հետո անցել են ուղղիչ անկման։ Հունվարի առաջին կեսին ֆյուչերսների հաշվարկային գները դրսևորել են անկայուն դինամիկա։ 
Փորձագետները գազի գնի բարձրացումը պայմանավորում են մի քանի գործոններով՝ եվրոպական ստորգետնյա պահեստարանների զբաղվածության ցածր մակարդակը (երկար ցուրտ ձմեռից և շոգ ամառից հետո), հիմնական մատակարարների կողմից մատակարարումների սահմանափակությունը և Ասիայում հեղուկացված բնական գազի մեծ պահանջարկը: