Արտակարգ դեպք Արարատի մարզում. «բուտուլիզմ» ախտորոշմամբ տարբեր հիվանդանոցներ են տեղափոխվել քաղաքացիներ
Երեկ՝ դեկտեմբերի 23-ին, թունավորման դեպք է տեղի ունեցել Արարատի մարզում: Ժամը 21:00-ի սահմաններում «Մասիս» բժշկական կենտրոնից ոստիկանության Մասիսի բաժին ահազանգ է ստացվել, որ «սննդային թունավորում» ախտորոշմամբ իրենց մոտ են տեղափոխվել մի քանի քաղաքացիներ:
Ինչպես հայտնում է shamshyan.com-ը, հիվանդանոց են մեկնել ոստիկանության Արարատի մարզային վարչության պետ Սարիբեկ Ռուստամյանն ու ոստիկանության Մասիսի բաժնի պետ Վահագն Գրիգորյանը: Ոստիկանները պարզել են, որ հիվանդանոց տեղափոխվածներն են՝ Նոր Խարբերդի բնակիչներ, 32-ամյա Անահիտ Հ.-ն, 12-ամյա Հասմիկ Ն.-ն, 27-ամյա Մամիկոն Հ.-ն, ովքեր հայտնել են, որ երեկ տանը կերել են մարինացված վարունգ:
Մինչ ոստիկաննեը դեպքի հանգամանքներն էին պարզում, Մասիսի ոստիկանություն ժամը 23:00-ին «Արմենիա» բժշկակակ կենտրոից ահազանգ է ստացվել, որ «բուտուլիզմ» ախտորոշմամբ իրենց մոտ է տեղափոխվել մի քաղաքացի: Մասիսի ոստիկանները պարզել են, որ նա նույն գյուղի բնակիչ, 71-ամյա Յուրիկ Ն.-ն է, ով նույնպես մարինացված վարունգ է կերել:
Ոստիկանության Մասիսի բաժնի համայնքային ոստիկանության բաժանմուքնի տեսուչ Շմավոնյանը, մեկնելով Նոր Խարբերդ, պարզել է, որ նույն գյուղի 2-րդ փողոցի տներից մեկում, որը պատկանում է Անահիտ Հ.-ին, կերել են տան պայմաններում մարինցաված վարունգ, ինչի հետևանքով էլ նրանց ինքնազգացողությունը վատացել է և տեղափոխվել են նախ «Մասիս» բժշկական կենտրոն, որտեղից Հասմիկ Ն.-ն այնուհետև տեղափոխվել է «Մուրացան» բժշկական կենտրոն: Փաստի առթիվ ոստիկանության Մասիսի բաժնում նյութեր են նախապատրաստվում:
