Իշխանությունը քննարկում է նաև Երևանում մետրոյի երկրորդ կայարան կառուցելու հարցը, թեև վերջնական որոշում դեռ չի կայացվել, Sputnik Արմենիայի հետ զրույցում ասաց ՀՀ էկոնոմիկայի փոխնախարար Նարեկ Տերյանը:
 

«Այս պահին ֆինանսական տարբեր գործիքներ ենք քննարկում։ Խոսքը ոչ այնքան վարկի մասին է, որքան այլ գործիքների։ Այժմ երկխոսության մեջ ենք Արտահանման վարկերի և ներդրումների ապահովագրման ռուսական գործակալության հետ։ Կարծում եմ՝ մոտ ժամանակներս կկարողանանք նրանց հետ սահմանել չափանիշները, ասել, թե որ ուղղությամբ ենք շարժվում, արդյոք դա վարկ կլինի, թե ֆինանսական այլ գործիք», - նշեց Տերյանը։
 

Նրա խոսքով՝ հնարավոր գործիքների թվում են, օրինակ, Արտահանման վարկերի և ներդրումների ապահովագրման ռուսական գործակալության կողմից լիզինգային ծրագրերը։ Վերջնական որոշում, ըստ նրա, դեռ չի կայացվել։
 

Այս պահին «Մետրոգիպրոտրանսը» մետրոպոլիտենի զարգացման նախագիծ է առաջարկել։
 

«Խոսքը միայն մետրոյի մեկ կայարանի մասին չէ, այլ քննարկվում է գիծը երկարացնելու և մետրոյի երկրորդ կայարան կառուցելու տարբերակը։ Այսինքն` ընդհանուր առմամբ բավականին մեծ նախագիծ է, որը համակարգելու կարիք ունի։ Բայց հույս ունեմ, որ մոտ ժամանակներս կորոշենք վերջնական պարամետրերն ու կկարողանանք այդ մասին ասել հանրությանը», - ասաց Տերյանը։
 

Ինչ վերաբերում է 500 միլիոն դոլարի վարկին, ապա դա նախնական գումար է։ Քանի որ նախագիծը դեռ վերջնական տեսք չի ստացել, դեռ վաղ է գումարի մասին խոսելը։
 

Ծախսերի առումով ավելի շահավետ է միանգամից երկու կայարանի կառուցումը:

Ավելի վաղ հայտնել էինք, որ Երևանի մետրոյի նոր՝ «Աջափնյակ» կայարանի նախագծի մրցույթում հաղթող է ճանաչվել ռուսաստանյան «Մետրոգիպրոտրանս» ընկերությունը: Նոյեմբերի 20-ին Երևանի քաղաքապետարանում տեղի է ունեցել «Աջափնյակ» կայարանի նախագծման պայմանագիրը նշված ընկերությանը հանձնելու արարողությունը: