ՏԵՍԱՆՅՈՒԹ. Փաշինյան-Պուտին առանձնազրույցը
Ինչպես արդեն հայտնել ենք՝ ՌԴ, ՀՀ և Ադրբեջանի ղեկավարներն ավարտել են Սոչիում եռակողմ բանակցությունները: Հանդիպումը տևել է 3 ժամ:
Եռակողմ բանակցություններից հետո հետո Պուտինն առանձին հանդիպում է անցկացրել Փաշինյանի հետ։
Փաշինյանը՝ Սոչիում ՌԴ նախագահ Վլադիմիր Պուտինի հետ հանդիպմանը հայտնել է, որ Հայաստանում 2021-ին ռուսական ներդրումների ակտիվացում է նկատվում:
«2021 թվականին նկատվում է ռուսական ներդրումների որոշակի ակտիվացում Հայաստանում: Եվ սա մեզ համար շատ կարևոր է, քանի որ կարծում եմ, որ սա ազդանշան է ներդնողների համար, որ ՀՀ-ն շատ հուսալի երկիր է տարածաշրջանում և սա, իհարկե, շատ կարևոր է մեզ համար»,-ասաց Փաշինյանը:
Նա նշեց, որ, ցավոք, կորոնավիրուսի հետ կապված տնտեսական դժվարությունները շարունակվում են: ԵԱՏՄ-ի շրջանակում գրանցվել է առևտրաշրջանառության ակտիվացում:
Վարչապետը հույս հայտնեց, որ վերջիվերջո կհասնեն տարածաշրջանում բոլոր տնտեսական և տրանսպորտային կոմունիկացիաների բացման որոշմանը, որ միանշանակ կբերի առևտրատնտեսական կապերի ակտիվացման՝ ԵԱՏՄ շրջանակում և Հայաստանի և Ռուսաստանի երկկողմ հարաբերություններում:
ՀՀ վարչապետը շեշտեց, որ Հայաստանի և Ռուսաստանի երկկողմ հարաբերությունները շատ կարևոր են:
