Խորհրդարանում հրատապ քննարկում է հրավիրվել

Խորհրդարանում Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանի նախաձեռնությամբ աշխատանքային հրատապ քննարկում է ընթանում՝ Գորիս-Կապան ճանապարհի հատվածում ադրբեջանական մաքսակետեր տեղադրելու վերաբերյալ: 

Նիստին մասնակցում են «Հայաստան» և «Պատիվ ունեմ» խմբակցությունների պատգամավորները: 

Թագուհի Թովմասյանի նշեց, որ քննարկմանը հրավիրված են եղել նաև գործադիրի ներկայացուցիչները և իշխող «Քաղաքացիական պայմանագիր» խմբակցության պատգամավորներ, սակայն նրանցից որևէ մեկը ներկա չի քննարկմանը. 

«Գորիս-Կապան ճանապարհին տեղադրվել են մաքսային կետեր, ստացվում է, որ ՀՀ տարածքի մասին այլևս պետք է անցյալով խոսենք, և չենք կարողանալու օգտվել այդ տարածքից: Սա վարչապետն ասում է՝ սառը դատողությունների հորդորով և սառը գլխով որոշումներ կայացնելու անհրաժեշտությամբ, ինչն անընդունելի է»,-ասաց պատգամավորը: 

Թագուհի Թովմասյանը նշեց, որ Նիկոլ Փաշինյանը հստակ պետք է պատասխանի հետևյալ հարցերին՝ 

- Ինչի՞ հիման վրա եք հայտարարել, որ ադրբեջանական անցակետը չի գտնվում ՀՀ տարածքում։ 

- Արդյոք արդեն իրականացվել է դեմարկացիա և դելիմիտացիա։ Միայն դրա հիման վրա դուք կարող էիք նման հայտարարությամբ հանդես գալ։ 

- Ի՞նչ իրավական հիմքով է հայտարարվում, որ անցակետը ՀՀ տարածքից դուրս է․ ո՞ր քարտեզի հիման վրա։ 

- Երբ պետական սահմանի փոփոխություն է իրականացվում, այն իրականացվում է «Պետական սահմանի մասին» ՀՀ օրենքի փոփխությամբ։ Մենք օրենքի որևէ փոփոխություն չենք իրականացրել, հետևաբար սա իրավական տեսանկյունից խնդրահարույց է։ 

- Ինչպե՞ս է իրականացվելու ադրբեջանական սահմանային ու մաքսային վերահսկողության պայմաններում մարդկանց ու ապրանքների ազատ և անվտանգ տեղաշարժը։ 

Թագուհի Թովմասյանը նշեց, որ ակնկալում են 
այս հարցերի պարզաբանումները ստանալ կառավարությունից, բայց մինչ այս պահը արձագանք չկա. 

«Հույս ունենք, որ Կառավարության ներկայացուցիչը, որին կլիազորի վարչապետը, կներկայանա խորհրդարան: Իսկ եթե չներկայանա, մենք մեր ասելիքը հրապարակավ պետք է փոխանցենք՝ ակնկալելով, որ առաջիկայում ինչ-որ ֆորմատ կձևավորվի և հնարավորություն կունենանք մինչև լիագումար նիստերի սկսվելը պարզաբանումներ կստանանք»,-ասաց նա: