«Սա աբսուրդ է, գործող իշխանությունը չի կարող քննել իր հանցագործության վարկածը». Թագուհի Թովմասյան
Ենթադրյալ հանցագործը չի կարող իր հանցագործության մասին վարկած քննել։ Սա աբսուրդ է: Այս մասին այսօր լրագրողների հետ զրույցում հայտարարել է «Պատիվ ունեմ» խմբակցության պատգամավոր Թագուհի Թովմասյանն՝ անդրադառնալով 44-օրյա պատերազմի հանգամանքները քննող հանձնաժողովի ձևավորմանը:
Պատգամավորն ընդգծեց, որ այդ հանձնաժողովից օբյեկտիվություն ակնկալել հնարավոր չէ.
«Գործող իշխանությունը չի կարող քննել իր հանցագործության վարկածը։ Ես շատ հասցեական ասացի, որովհետև այդ հանձնաժողովում ներգրավվում են մարդիկ, որոնք պատերազմի ընթացքում ունեցել են պաշտոններ։ Հասկանալի է, որ եթե քննությունը հասնի մի փուլի, երբ հասկանալի լինի՝ մեղադրանքն անխուսափելի է, բնականաբար, արվելու է ամեն ինչ, որ այդ մեղադրանքը կյանքի չկոչվի, որևէ քննություն չիրականացնի»,-ասաց Թովմասյանը և հավելեց. «Եթե իշխանություն փոխված լիներ և մենք ունենայինք ապրիլյան քննիչ հանձնաժողովի օրինակը, հասկանալի կլիներ՝ իշխանությունը փոխվել է, եկող իշխանությունը քննում է նախորդի գործունեությունը, բայց գործող իշխանությունը չի կարող քննել իր գործողությունները, սա աբսուրդ է»:
