Պռոշյան գյուղում մեկ ամսից ավելի է, ծնողները երեխաներին մանկապարտեզ ու դպրոց են տանում ահը սրտներում

Արդեն մի քանի օր է, Shamshyan.com-ը բազմաթիվ հեռախոսազանգեր է ստանում Կոտայքի մարզի Պռոշյան գյուղի բնակիչներից, ովքեր արդարացիորեն իրենց զայրույթն են հայտնում, որ  սեպտեմբերի 1-ից սկսած իրենք հայտնվել են անելանելի վիճակում: Այսօր՝ հոկտեմբերի 18-ին, ֆոտոլրագրող Գագիկ Շամշյանի  հետ զրույցում բնակիչներն ասում էին.

 «Ինչ-որ կազմակերպություն մրցությով  (տենդեր) շահել է,  ինչի արդյունքում գյուղի Երևանյան փողոցում սկսվեցին նոր կոյուղատարերի տեղադրման աշխատանքներ:  Սեպտեմբերի  1-ից սկսվեցին այդ աշխատանքները:  Ողջ գյուղով ուրախացել էինք, որ վերջապես գյուղը կունենա կանոնավոր կոյուղատարեր:  Տրակտորիստն ու բանվորները թասիբով լծվել էին աշխատանքների կատարմանը, պարտաճանաչ կատարում էին իրենց աշխատանքը:  

Արդեն մեկ ամիս է, էդ մարդկանց կատարած աշխատանքի դիմաց տենդեր շահող ընկերությունը  աշխատավարձ չի տվել ու մարդիկ հայտնվել են «քցվածի»  դերում: Հիմա գյուղի Երևանյան փողոցը դարձել է մի իսկական պատուհաս: Հսկայական փոսերը լուրջ վտանգ են իրենցից ներկայացնում, իսկ ուժեղ քամու ժամանակ էլ փոշին լցվում է մարդկանց տները:   Մի քանի անգամ դիմել ենք Կոտայքի մարզպետարան, սակայն արժանացել ենք արհամարհանքի: Մարզպետարանի ոչ մի չինովնիկ չի բարեհաճում գոնե մի անգամ այցելեն այստեղ ու տեսնեն, թե ինչ բարձիթողի վիճակ է տիրում:  Այս ճանապարհով երեխաներին ամեն առավոտ մանկապարտեզ ու դպրոց են ուղեկցում 200-ից ավելի տների բնակիչներ: Նույնիսկ մի քանի դեպքեր են  եղել, երբ մարդ է վատացել, իսկ շտապօգնության բժիշկները,  որ օպերատիվ մեկնեն գյուղ էդ անտեր փորած հատվածով  30-40 րոպե է տևել մինչև հասել են կանչի վայր: Ասում են՝ տենդեր շահողի անունը Արթուր է, նույնիսկ չգիտենք էլ ինչ կազմակերպություն է, ովքեր են: Եթե նախկինում նման աշխատանքներ էին կատարվում, ապա այդ կազմակերպությունը ցուցանակներ էր տեղադրում, որի վրա գրված էր լինում՝ երբ են սկսվել շինարարական աշխատանքները և երբ են ավարտվելու: Շինարարական աշխատանքների ժամանակ էլ տեղադրվում էին նախազգուշացնող ցուցանակներ, գիշերային ժամերի համար էլ լուսավորության հատուկ սարքեր: Բայց էստեղ լրիվ աջափսանդալային վիճակ է:   Ուզում ենք հավատալ, որ գոնե հիմա Կոտայքի մարզպետարանը հետամուտ կլինի և խնդիրը կարճ ժամանակում կլուծեն, հակառակ դեպքում՝  հեսա որ անձրևն ու ձյունը  սկսվի, ավելի է բարդանալու վիճակը»: