Իսրայելը ձգձգում կամ խոչընդոտում է բանակցությունները, որպեսզի շարունակի պատերազմը

Գազայի հատվածում ռազմական ներկայությունը պահպանելու Իսրայելի ձգտումը բարդացնում է միջնորդների խորհրդակցությունները հակամարտության կողմերի հետ։ Այս մասին հայտնում է Agence France-Presse-ը (AFP)՝ վկայակոչելով պաղեստինյան անկլավում իր աղբյուրները։

Իսրայելը ներկայացրել է Գազայի հատվածից զորքերի դուրսբերման քարտեզը, որը, պաղեստինյան կողմի կարծիքով, ընդամենը իսրայելական բանակի վերատեղակայման եւ վերախմբավորման ծրագիր է: Նշվում է, որ Իսրայելը շարունակում է ձգձգել բանակցությունները և խոչընդոտել համաձայնության գալուն, որպեսզի շարունակի պատերազմը։

Հավելենք՝ Իսրայելի ներկայացրած քարտեզը նախատեսում է զինված ուժերի պահպանում Գազայի հատվածի տարածքի ավելի քան 40% - ում: Պաղեստինյան ՀԱՄԱՍ շարժումը մերժում է այդ ծրագիրը։

Միևնույն ժամանակ Դոհայում կայացած խորհրդակցությունների ժամանակ որոշակի առաջընթաց է գրանցվել Գազայի հատված մարդասիրական օգնություն հասցնելու և անկլավում պահվող իսրայելցի պատանդներին Իսրայելում պահվող պաղեստինցի բանտարկյալների հետ փոխանակելու հարցերի շուրջ: