Դարն ապրած էլեկտրասյունը տապալման եզրին է, իսկ ՀԵՑ-ը՝ անտարբեր
Արդեն 2 օր է, Երևան քաղաքի Սարալանջից դեպի Էրեբունի վարչական շրջանի Բուռնազյան փողոցի սկզբնամասը ճանապարհը փակվել է: Ինչպես հայտնում է shamshyan.com-ը, պատճառը, ըստ Բուռնազյան փողոցի բնակիչների, «Հայաստանի էլեկտրացանցեր» ընկերության քար անտարբերությունն է: Ֆոտոլրագրող Գագիկ Շամշյանի հետ զրույցում բնակիչներն ասում էին. «Տարիներ շարունակ այս հատվածում ԽՍՀՄ տարիներին տեղադրված փայտե էլեկտրասյունը ամեն պահի հնարավոր է տապալվի: Այս պահին էլ էլեկտրասյունը, կարելի է ասել, տապալված է, պարզապես էլեկտրալարերն են պահում: Բազմիցս դիմել ենք «Հայաստանի էլեկտրացանցեր» ընկերությանն ու Էրեբունի թաղապետարան, սակայն ցուցաբերել են քար անտարբերություն:
2 օր առաջ ստիպված դիմեցինք Արտակարգ իրավիճակների նախարարության 911 ճգնաժամային կառավարման կենտրոն, որտեղից մարդիկ օպերատիվորեն արձագանքեցին մեր ահազանգերին, բայց դե հո սա փրկարարների անելիքը չէ, պետք է «Հայաստանի էլեկտրացանցերը» միջոցներ ձեռնարկեն՝ դարն ապրած էլեկտրասյունը նորով փոխարինելու համար: Բայց ոնց գցում բռնում ենք, նրանց չի հուզում այդ խնդիրը: Երևի սպասում են սյունը տապալվի մեկի գլխին, որ նոր տեղներից շարժվեն: ԱԻՆ-ի ներկայացուցիչները եկել են, սահմանազատել են տարածքը, բայց դե իրենք հո ստոլբա փոխող չեն: 100-ի ավելի տներ էդ էլեկտրասյան հույսին են: Պատկերացնում ենք, եթե տապալվի, ինչ կլինի: Այսօր Էրեբունու թաղապետարանից եկան, նկարեցին ու գնացին:Ամոթ չունենային, կարող ա մի հատ էլ սելֆի անեին ու այդքանով համարեին իրնեց գործն ավարտված: Ում դիմենք, չգիտենք: Վճարումներն էլ կանոնավոր կատարում ենք: Գոնե մի քիչ մարդկային մոտեցում ցուցաբերեն ու էդ անտեր խնդիրը լուծեն, իսկ դա դժվար չի: Մի քանի ժամվա սրտացավ աշխատանք ու հարցը կլուծվի»:
