Սահմանի վրա ապրող մարդը ստիպված իր գործը թողել, եկել ճանապարհ է փակել․ Հակոբ Ավետյան
Մեր գյուղը սահմանապահ գյուղ է, բնակիչները միայն սահմանը չեն պաշտպանում, այլ նաև ապրում են սահմանին ու ընդհանրապես նրանց կարծիքը հաշվի չառնելը անբարոյական է և անհարգալից վերաբերմունք է ժողովրդի նկատմամբ։ Այս մասին քիչ առաջ լրագրողների հետ զրույցում ասաց Գեղամասար համայնքի ղեկավար Հակոբ Ավետյանը՝ Սոթք-Վարդենիս ճանապարհը փակած պահելու ժամանակ։ Նշենք՝ համայնքների խոշորացման դեմ բողոքի ակցիա իրականացնող Գեղամասարի բնակիչները քիչ առաջ արդեն բացել են ճանապարհը՝ զինծառայողների հերթափոխին չխանգարելու համար։
«Սահմանի վրա ապրող մարդը ստիպված իր գործը թողել, եկել ճանապարհ է փակել, որ իրեն որպես մարդ հաշվեն, սա շատ վատ վերաբերմունք է իշխանությունների կողմից մեր ժողովրդի հանդեպ: Գնել Սանոսյանն ինձ անձամբ ասել է, ձեր համայնքը ցրելու եմ, դու էլ դատվելու ես: Դա իմ քաղաքական հայացքների հետ է կապված, ով իրենց հետ չի՝ իրեն որպես դուշման են նայում »,- ասաց Ավետյանը։
