Խոշոր ավտովթար Երևանում. Հերացի փողոցում բախվել են Ford Transit-ը և Opel-ը. կան վիրավորներ

Այսօր՝ սեպտեմբերի 2-ին, խոշոր ավտովթար է տեղի ունեցել Երևանում: Այս մասին հայտնում է Shamshyan.com-ը: Ժամը 08:00-ի սահմաններում Հերացի փողոցի թիվ 2 հասցեի դիմաց բախվել են Կոտայքի մարզի բնակիչներ, 30-ամյա Վահագն Նիկողոսյանի վարած Ford Transit-ն ու 29-ամյա Անդրանիկ Զեյնալյանի վարած Opel մակնիշի ավտոմեքենաները:

Վթարի հետևանքով Ա. Զեյնալյանը, նրա ուղևոր, Կոտայքի մարզի բնակիչ, 33-ամյա Ա. Բ.-ն մարմնական վնասվածքներով տեղափոխվել են թիվ 1 համալսարանական հիվանդանոց, որտեղից Ա.Բ.-ն տեղափոխվել է «Էրեբունի» բժշկական կենտրոն: Դեպքի վայր են ժամանել Արտակարգ իրավիճակաների նախարարության փրկարար ծառայության Երևանի հրշեջ-փրկարարական ջոկատից 2 մարտական հաշվարկ:

Վիրավորներին առաջինը օգնության են հասել քաղաքացիներն ու փրկարարները: Երևանի 1-03 շտապօգնության բժիշկների հերթապահ խմբերը, մինչև հիվանդանոց տեղափոխելը, տեղում առաջին բուժօգնությունն են ցուցաբերել վիրավորներին:

Փաստի առթիվ նյութեր են նախապատրաստվում: