Դուբայի օդանավակայանում երկու ինքնաթիռ բախվել են իրար

Էմիրաթների Flydubai բյուջետային ավիաընկերության՝ Դուբայից Բիշքեկ ուղևորվող ինքնաթիռը հինգշաբթի վաղ առավոտյան թռիչքուղում բախվել է Բահրեյնի Gulf Air ավիաընկերության ինքնաթիռին, ոչ ոք չի տուժել, բայց ուղեւորները ստիպված են եղել ավելի ուշ թռչել այլ չվերթներով, հայտնում է ՌԻԱ Նովոստին։ 

«Flydubai-ի չվերթը  Դուբայի միջազգային օդանավակայանից Բիշքեկի միջազգային օդանավակայան վերադարձել է կայանատեղի հուլիսի 22-ին թռիչքուղում ոչ մեծ միջադեպի պատճառով՝ մեր նոր սերնդի Boeing 737-800 ինքնաթիռներից մեկի եւ մեկ այլ ինքնաթիռի մասնակցությամբ։ Ուղեւորները թռել են ավելի ուշ չվերթով։ Flydubai-ը իշխանությունների հետ միասին կհետաքննի միջադեպը»,- նշել է ավիափոխադրողի պաշտոնական ներկայացուցիչը։ 

Իր հերթին Gulf Air ավիաընկերությունը՝ Բահրեյնի թագավորության ազգային ավիափոխադրողը, հաստատել է ՌԻԱ «Նովոստի»-ին, որ «Դուբայի միջազգային օդանավակայանում իր ինքնաթիռներից մեկը վթարի է ենթարկվել գետնին այն բանից հետո, երբ մեկ այլ ինքնաթիռ հարվածել է այդ ինքնաթիռի պոչին»։