Վուչիչը զգուշացրել է․ «Մենք մեծ պատերազմի շեմին ենք»

Սերբիայի նախագահ Ալեքսանդր Վուչիչը հայտարարել է, որ աշխարհը գտնվում է «մեծ պատերազմի շեմին»։

Նրա խոսքով՝ երկրները բավարար քայլեր չեն ձեռնարկում հնարավոր լայնածավալ պատերազմը կանխելու համար։

«Առաջիկա տարիներին աշխարհում ուժերի նոր դասավորության ձևավորման գործընթացը կուղեկցվի ավելի կործանարար միջոցների կիրառմամբ»,- ասել է Վուչիչը:

Նրա կանխատեսմամբ՝ առաջիկա հինգ տարիներին ԱՄՆ-ն ու Չինաստանը կմնան աշխարհի հիմնական ուժային կենտրոնները։ Նրանց կհետևի Եվրամիությունը, իսկ հետո՝ Ռուսաստանը, Հնդկաստանը և այլ խոշոր տարածաշրջանային տերություններ։

Վուչիչը նաև նշել է, որ առաջիկա տարիներին խոշոր տերությունները կձգտեն ավելի անկախ լինել և նվազեցնել արտաքին ուժերից կախվածությունը։