Ազգությամբ հայ Արսեն Ավակովը հրաժարականի դիմում է ներկայացրել Ուկրաինայի ՆԳՆ ղեկավարի պաշտոնից
Ուկրաինայի ՆԳՆ ղեկավար, ազգությամբ հայ Արսեն Ավակովը հաստատել է, որ ինքը ներկայացրել է պաշտոնից ազատման դիմում:
Այս մասին ասված է նախարարության կայքում հրապարակված հաղորդագրության մեջ:
«Համաձայն «Ուկրաինայի նախարարների կաբինետի մասին» Ուկրաինայի օրենքի 18-րդ հոդվածի առաջին մասին՝ հրաժարականի դիմում եմ ներկայացրել Ներքին գործերի նախարարի պաշտոնից հրաժարվելու մասին», – հայտարարել է Ավակովը:
Ավակովը նաև շնորհակալություն է հայտնել Ուկրաինայի ՆԳՆ աշխատակազմին՝ «համատեղ աշխատանքի համար»:
Ավակովի հրաժարականի որոշման պատճառը չի նշվում:
Ավելի վաղ ուկրաինական լրատվամիջոցները հաղորդել էին, որ Գերագույն ռադան հուլիսի 15-ին կքննարկի ՆԳՆ ղեկավար Արսեն Ավակովի պաշտոնանկության հարցը։
