«Քվեարկելու կարգի մասին մի քանի հոդված կա, այդքանը ո՞նց կարող էին տեղավորել փոքրիկ քվեաթերթիկի վրա»․ Հրայր Թովմասյանը՝ Արտակ Գալստյանին

Սահմանադրական դատարանում շարունակվում է հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննությունը:

 «Հայոց հայրենիք» կուսակցության ներկայացուցիչ Արտակ Գալստյանը, ներկայացնելով իրենց քաղաքական ուժի դիրքորոշումը, կարծիք հայտնեց, որ քվեաթերթիկի նմուշը հաստատելիս ԿԸՀ-ն թույլ է տվել Ընտրական օրենսգրքի 59-րդ հոդվածի խախտում, և որ քվեաթերթիկի նմուշը  չի համապատասխանել օրենքով սահմանված կարգին, այն է՝ դրա վրա նշված չի եղել քվեարկության կարգը:

ՍԴ դատավոր Հրայր Թովմասյանը հիշեցրեց, որ քվեարկության կարգին վերաբերում է ԸՕ-ի 2-րդ գլուխը, ուստի հետաքրքրվեց՝ արդյո՞ք դա նշանակում է, որ այդ ամբողջ ծավալով տեղեկատվությունը պետք է գրված լիներ քվեաթերթիկին:

Արտակ Գալստյանը հիշեցրեց, որ քվեաթերթիկները բավական մեծ էին, և դրանց դարձերեսին կարող էր տեղավորվել այդ ծավալի տեքստը:

ԿԸՀ ներկայացուցիչ, հանձնաժողովի քարտուղար Արմեն Սմբատյանը հիշեցրեց, որ երբ քվեաթերթիկի նմուշը հաստատվում էր ԿԸՀ նիստում, ներկա էր ու դրա տակ ստորագրել է նաև «Հզոր հայրենիքի» ներկայացուցիչը՝ որևէ առարկություն չհայտնելով:

Ինչ վերաբերում է առաջին էջին, Արտակ Գալստյանի խոսքով, այնտեղ գրված է միայն, որ որևէ նշում չպիտի պարունակի ու առավել ևս գրված չէ, թե ինչով նշում:

«Դա կարար լիներ գրիչով, կարար լիներ մատիտով, ֆլոմաստերով, կարար լիներ ընդամենը մատնահետքով, կարար լիներ ուղղակի շրթներկով: Դիցուք, ինչ-որ մեկը սիրահարված է Նիկոլ Փաշինյանին ու որոշել է այդտեղ համբույր դնի»,- ասաց Գալստյանը:

Սմբատյանը դարձյալ շեշտեց, որ «Հզոր հայրենիքը» ԿԸՀ այդ որոշման դեմ չի առարկել ու չի բողոքարկել: