Լոռու մարզպետը՝ Օձունի համայնքապետին ծեծի ենթարկելու լուրերի մասին

Ո՞վ է ասում, որ ծեծի եմ ենթարկել։ Այս մասին կառավարությունում լրագրողների հետ ճեպազրույցում ասաց Լոռու մարզպետ Արամ Խաչատրյանը՝ անդրադառնալով հարցին, թե ինչու է ծեծի ենթարկել Օձունի համայնքապետ Արսեն Տիտանյանին։

Դիտարկմանը, թե Օձունի համայնքապետը հաստատել է, Խաչատրյան արձագանքեց՝ եթե հաստատել է, դա փա՞ստ է։ «Նման բան չի եղել, նման բան տեղի չի ունեցել»,-ասաց նա։

Դիտարկմանը՝ այդ դեպքում Օձունի համայնքապետն ինչի՞ հիման վրա է դիմել Ոստիկանություն, Լոռու մարզպետն արձագանքեց՝ դիմել է, թող Ոստիկանությունն զբաղվի։

Հիշեցնենք՝ «Հայաստան» դաշինքը հայտարարություն է  տարածել, որ բոլոր համայնքներում համայնքապետերին սպառնալիքներով հորդորում են ինքնակամ հրաժարական տալ, ու Լոռու մարզպետարանում նման պահանջ է դրվել նաև Օձունի համայնքապետ Արսեն Տիտանյանի առջև, և երբ նա հրաժարվել է կատարել մարզպետի պահանջը, հենց մարզպետարանի շենքում ծեծի է ենթարկվել։