Հիմա քարոզչություն անելու ժամանա՞կ է․ Սերժ Սարգսյան

Հիմա քարոզչություն անելու ժամանա՞կ է, թշնամին մեր երկրում է, ես անհարմար եմ զգում։ Կապիտուլյանտը գնում, միտինգներ է անում․ այս ընթացքում ինչ ասես, արել է, քարոզչություն է իրականացնում, ընտրություն է անում։ Այս մասին Մասիսում «Պատիվ ունեմ» դաշինքի համակիրների հետ հանդիպմանը հայտարարել է ՀՀ երրորդ նախագահ, ՀՀԿ նախագահ Սերժ Սարգսյանը՝ անդրադառնալով Նիկոլ Փաշինյանին։

«Մենք քարոզչություն անելու սի՞րտ ունենք այս օկուպացված երկրում։ Ինձ համար ամոթ է: Ամաչում եմ, իրենց փոխարեն ամաչում եմ, իսկ այդ սատանաներն այստեղ-այնտեղ ընկած քարոզչություն են անում,-ասել է նա՝ հավելելով,-Մենք էլ անենք, բայց իմացեք, որ դա մեր սրտով չէ։ Իմ երեսը չի բռնի՝ գնամ սուտ բան ասեմ, Վանեցյանի երեսը չի բռնի՝ գնա սուտ բան ասի։ Իսկ ինքը չի սատկում․ ասում է՝ հպարտ եմ, որ պարտվել ենք և կարող ենք բաց աչքով նայել ձեզ։ Մարդկանց ինչի՞ տեղ է դրել։ Այո՛, մենք ուզում ենք ընտրություններում շատ ձայներ տանել, բայց այդ կապիկությունների ժամանակը չէ»,-հայտարարել է ՀՀ երրորդ նախագահը։