Իրանի նախագահը շնորհավորական ուղերձ է հղել Ալիևին

Իրանի նախագահ Հասան Ռոհանին Ադրբեջանի ազգային օրվա առթիվ շնորհավորական ուղերձ է հղել երկրի նախագահ Իլհամ Ալիևին՝ կարևորելով երկրների միջև հարաբերությունները և վստահություն հայտնելով, որ իրենք կզարգացնեն փոխգործակցությունը տարբեր ոլորտներում: 

Ինչպես փոխանցում է «Թանսիմ» գործակալությունը, Ալիևին ուղված ուրբաթօրյա ուղերձում Ռոհանին շնորհավորել է «եղբայրական և բարեկամ» երկրի կառավարությանն ու ժողովրդին: 

«Որպես երկու բարեկամական հարևաններ՝ Իրանի Իսլամական Հանրապետությունն ու Ադրբեջանի Հանրապետությունը բարձր մակարդակով եղբայրական հարաբերություններ են ձևավորել Ադրբեջանի անկախությունից ի վեր՝ ապավինելով պատմական, մշակութային և կրոնական կապերին»,-ասվում է Ռոհանիի ուղերձում: 

Իրանցի նախագահը նաև հույս է հայտնել, որ իրենց երկրները կամրապնդեն համագործակցությունը, կզարգացնեն քաղաքական, տնտեսական և մշակութային կապերը, ինչպես նաև կխորացնեն տարածաշրջանային խաղաղությունն ու կայունությունը: