Ազգային ժողովը մեկ րոպե լռությամբ հոտընկայս հարգեց ադրբեջանցիների կրակոցից զոհված զինծառայողի հիշատակը
Ազգային ժողովը մեկ րոպե լռությամբ հոտընկայս հարգեց Հայաստանի սահմաններից ներս գտնվող ադրբեջանցիների կրակոցից զոհված զինծառայողի հիշատակը:
Նիստի մեկնարկին ԱԺ նախագահ Արարատ Միրզոյանն ասաց. «Ինչպես գիտեք, երեկ ապօրինաբար Հայաստանի սահմաններից ներս գտնվող ադրբեջանցիների արձակած կրակոցից հայ զինծառայող է զոհվել: Առաջարկում եմ մեկ րոպե լռությամբ հարգել հիշատակը»: Մայիսի 25-ին Գեղարքունիքի մարզի Վերին Շորժայի սահմանային հատվածում հակառակորդի արձակած կրակոցների հետևանքով մահացու հրազենային վիրավորում էր ստացել պայմանագրային զինծառայող, կրտսեր սերժանտ Գ. Յ. Խուրշուդյանը (ծնված` 1989 թ.)։
Սևանի կայազորի զինվորական դատախազությունում քրեական գործ է հարուցվել հակառակորդի կողմից արձակված կրակոցների հետևանքով ՀՀ ԶՈՒ պայմանագրային զինծառայողի մահվան դեպքի առթիվ։
