Իսրայելի իշխանությունները հաստատել են հրադադար սահմանելու մասին որոշումը
Իսրայելի կառավարությունը որոշում է կայացրել Գազայի հատվածի ուղղությամբ ավիահարվածները դադարեցնելու մասին: Այս մասին հայտնում է «ՌԻԱ Նովոստի»-ն՝ հղում անելով իսրայելական հեռուստաալիքին:
Հաղորդվում է, որ հինգշաբթի երեկոյան երկրի անվտանգության հարցերով կառավարությունը նիստ է անցկացրել՝ նվիրված Գազայի հատվածում հետագա գործողություններին:
Տեղի ԶԼՄ-ներն ավելի վաղ հայտնել էին, որ ուժային գերատեսչությունների ղեկավարներն ու նախարարները կքննարկեն միակողմանի հրադադարի մասին հարցը:
Միևնույն ժամանակ Իսրայելի պաշտպանության նախարար Բենի Գանցը հայտարարել էր, որ պատրաստ է ընդլայնել ռազմական արշավը ՀԱՄԱՍ-ի դեմ:
Պաղեստինցիների և իսրայելցիների միջև անցյալ շաբաթ սկսված բախումների հետևանքով պաղեստինյան կողմում զոհերի թիվը անցել է 220-ը, որոնցից 63-ը երեխա և ավելի քան 34-ը կին, վիրավորվել է մոտ 1500 պաղեստինցի, իսկ իսրայելական կողմում զոհերի թիվը 12-ն է, այդ թվում՝ 2 երեխա։ Վիրավորների թիվը առնվազն 300 է։ Երուսաղեմում հուզումները սկսվել են մայիսի 7-ին: Արաբ երիտասարդների և ոստիկանության միջև բախումները բռնկվել են մայիսի 8-ի երեկոյան, այնուհետև շարունակվել՝ տարածվելով Տաճարի լեռան և Ալ-Աքսա մզկիթի տարածքում: Դրանք իրենց գագաթնակետին հասել են մայիսի 10-ին, երբ հրեաները նշում են Երուսաղեմի օրը:
