Մեր խնդիրը միասնական ճակատով հանդես գալն է. Հայրապետյանը հորդորեց փոխադարձ մեղադրանքների փոխարեն միասնական լինել
ՀՀ ազգային «Իմ քայլը» խմբակցության պատգամավոր Տաթևիկ Հայրապետյանը ընդդիմադիր գործընկերներին հորդորեց ԱԺ արտահերթ նիստում, որում քննարկվում է սահմանային իրավիճակը, փոխադարձ մեղադրանքներով հանդես չգալ, այլ ճիշտ գնահատել իրավիճակն ու միասնական ճակատով հանդես գալ: Հայրապետյանն այս մասին ասաց ԱԺ արտահերթ նիստում, որը հրավիրվել է ընդդիմադիր «Բարգավաճ Հայաստան» խմբակցության նախաձեռնությամբ:
Նա նախ շնորհակալություն հայտնեց նիստը նախաձեռնելու համար ու նշեց. «Կարծում եմ, որ մեր խնդիրը հիմա ոչ թե փոխադարձ մեղադրանքներով այսօր այստեղ հանդես գալն է, այլ իրավիճակը ճիշտ գնահատելը և միասնական ճակատով հանդես գալը: Եթե մեր խնդիրը, այս նիստի նպատակն այն է, որ գանք, մտածենք, թե ով ինչը վատ արեց, ապա այո, կարող են բազմաթիվ թերացումներ լինել, դրա մասին էլ ժամանակ կլինի խոսելու»:
Հայրապետյանը հիշեցրեց՝ վարչապետի պաշտոնակատար Փաշինյանն էլ նշել է, որ դեռևս պետք է պարզվեն հանգամանքները: Նա շեշտեց, որ իրենց խնդիրը ԱԺ նիստում մեղավորներ փնտրելը չէ, այլ հասկանալը, թե ինչ ճանապարհով են առաջ գնում: «Ներքին թշնամիներ փնտրելու ժամանակ չէ»,-ասաց Հայրապետյանը:
Հայրապետյանը նաև նշեց՝ ոչ մեկի համար գաղտնիք չէ Ալիևի հռետորաբանությունը, տասնամյակներ շարունակ է այդ հռետորաբանությունը եղել: «Ու եթե ուզում եք ասել, որ Ալիևն առաջին անգամ էր Զանգեզուրի մասին խոսում, ապա ոչ, Ալիևը Զանգեզուրի մասին դեռևս 2000-ականների սկզբին էր խոսել»,-ասաց պատգամավորը՝ պատասխանելով ԲՀԿ-ից Նաիրա Զոհրաբյանի ելույթին:
