ԵՄ-ն ողջունել է Հայաստանի և Ադրբեջանի միջև արձանագրված առաջընթացը

Եվրամիությունը ողջունում է Հայաստանի և Ադրբեջանի միջև վերջին մեկ տարվա ընթացքում արձանագրված առաջընթացը։ Այս մասին հայտարարել է ԵՄ արտաքին գործերի և անվտանգության քաղաքականության ծառայության մամուլի քարտուղար Անիտա Հիփերը։

Խոսքը 2025 թվականի օգոստոսի 8-ին Վաշինգտոնում ձեռք բերված պայմանավորվածություններից հետո տեղի ունեցած զարգացումների մասին է։

«Խաղաղության համաձայնագրի նախագծի նախաձեռնումը և խաղաղության գործընթացի վերաբերյալ համատեղ հռչակագրի ստորագրումը 2025 թվականի օգոստոսի 8-ին դարձան պատմական քայլեր Ադրբեջանի և Հայաստանի միջև հարաբերությունների լիարժեք կարգավորման ճանապարհին»,- ասել է Հիփերը։

Նրա խոսքով՝ այդ ժամանակից ի վեր կողմերը կարևոր առաջընթաց են գրանցել։ ԵՄ-ն որպես արդյունք առանձնացրել է առևտրային և տարանցիկ սահմանափակումների վերացումը, պահվող անձանց ազատ արձակումը և երկու երկրների ներկայացուցիչների միջև շփումների ավելացումը՝ «Խաղաղության կամուրջ» նախաձեռնության շրջանակում։

Միաժամանակ Բրյուսելը կարևոր է համարում ձեռք բերված պայմանավորվածությունների հետագա իրականացումը, ինչպես նաև խաղաղության պայմանագրի ստորագրումն ու վավերացումը։

ԵՄ-ն կարևորում է նաև Հայաստանի և Ադրբեջանի միջև կապերի, առևտրի և էներգետիկ համագործակցության զարգացումը։

Հիփերի խոսքով՝ անհրաժեշտ է շարունակել նաև սահմանազատման և սահմանագծման գործընթացը, լուծել հումանիտար հարցերը և աշխատել երկու հասարակությունների միջև հաշտեցման ուղղությամբ։

«ԵՄ-ն պատրաստ է լրացուցիչ աջակցություն և փորձագիտական օգնություն տրամադրել այս բոլոր ոլորտներում»,- հայտարարել է Հիփերը։

Հիշեցնենք՝ 2025 թվականի օգոստոսի 8-ին Վաշինգտոնում Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագրի տեքստը նախաստորագրվել է։ Հանդիպմանը մասնակցել են ԱՄՆ նախագահ Դոնալդ Թրամփը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը։