Իշխանասարում իրավիճակը հանգիստ է. ոչ կռիվ կա, ոչ էլ՝ կրակոց. գյուղապետ

Իշխանասարում իրավիճակը հանգիստ է, Aysor.am-ին ասաց Իշխանասարի գյուղապետ Մարատ Պետրոսյանը։

«Իշխանասարում ոչ մի բան տեղի չի ունեցել, մենք ունենք «պալիգոն», կարող է «պալիգոն»-ից են կրակում, ընդհանրապես, անդորր է մեր մոտ», - ասաց նա։

Գյուղապետը նշեց՝ ոչ կռիվ կա, ոչ էլ՝ կրակոց։

«Խաղաղապահ զորքերը նստած են, խայտառակ բաներ են գրել, ես ամեն մի քայլին հետևում եմ», - նշեց Պետրոսյանը։

Նա ասաց, թե, հնարավոր է, Գորիսի կողմում ինչ-որ բան լինի։

«Բայց ամեն ինչ նորմալ է, ոչ մի բան չկա Սյունիքում, ձեր ցավը տանեմ, թող չսարքեն էս ժողովրդի գլխին», - հավելեց Իշխանասարի գյուղապետը։

Հիշեցնենք՝ Գորիսի փոխքաղաքապետ Իրինա Յոլյանը հայտնել էր, որ Իշխանասարի հատվածում թշնամին պետական սահմանն անցել է և ևս երեկ կիլոմետր առաջ եկել. հարյուրներով շարված են:

Գորիսի մյուս քաղաքապետ Մենուա Հովսեփյանն էլ հայտնել էր, թե թուրքը Սև լճի տարածքում առաջ է եկել և փորձ է կատարում տեղակայվելու:

Պաշտպանության նախարարությունը հայտարարությամբ  է հանդես եկել՝ հաստատելով, որ Ադրբեջանը փորձել է աշխատանքներ իրականացնել Սյունիքում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։ Այս պահին ընթանում են բանակցություններ՝ ստեղծված իրավիճակը հարթելու ուղղությամբ։