13:00 Լուրերը մեկ տողով.Ավագանու ծեծկռտուքի հետքերով. Forbes-ի անդրադարձը Հայաստանին

Անցած ժամվա լուրերը՝ հակիրճ և բովանդակային.

•Հունիսի 23-ին Երևանի ավագանու նիստում «Մայր Հայաստան» և «Քաղաքացիական պայմանագիր» խմբակցությունների անդամների միջև տեղի ունեցած ծեծկռտուքի դեպքով քրեական վարույթ է նախաձեռնվել ֆիզիկական ներգործության հոդվածով։

•Սահմանադրական դատարանը մասնակի բավարարել է ընդդիմադիր դաշինքի միջնորդությունը և ԿԸՀ-ից ու ԱԱԾ-ից պահանջել հունիսի 7-ի խորհրդարանական ընտրություններին մասնակցած քաղաքացիների ու սահմանը հատած անձանց վերաբերյալ ամբողջական տվյալներ։

•Փաստաբան Արամ Օրբելյանը ԿԸՀ-ի դիմաց լրագրողների հետ զրույցում քննադատել է հանձնաժողովի գործելաոճը՝ նշելով, որ պատգամավորի թեկնածուների նկատմամբ քրեական հետապնդման համաձայնություն տալու վարչական ակտը չունի որևէ իրավական պատճառաբանություն։

•Հեղինակավոր Forbes պարբերականն անդրադարձել է Գագարինում բացված նոր և գերհզոր Արհեստական Բանականության տվյալային կենտրոնին, որը հագեցած է NVIDIA Blackwell առաջատար պրոցեսորներով։

•Թուրքիայի խորհրդարանի նախագահը բարձր է գնահատել Հայաստանի և Ադրբեջանի միջև խաղաղության բանակցություններում ձեռք բերված առաջընթացը և հույս հայտնել, որ Հարավային Կովկասում կհաստատվի տևական կայունություն։

•Ադրբեջանի նախագահը Իսլամական համագործակցության կազմակերպության նստաշրջանի մասնակիցներին հղած ուղերձում հերթական անգամ անհիմն մեղադրանքներ է հնչեցրել Հայաստանի հասցեին՝ պնդելով, թե Արցախում ավերվել են իսլամական մշակութային հուշարձաններ։