Ռուսաստանյան կողմի միջնորդությամբ արդեն 70 ռազմագերիներ և այլ քաղաքացիական անձինք ազատ են արձակվել․ Այվազյան
Եվ՛ Մինսկի խմբի համանախագահները, և՛ տարբեր երկրների առաջանորդները, և՛ միջազգային մի շարք կազմակերպություններ հստակ արտահայտվել են, որ Արցախի խնդիրը լուծված չէ։ Այս մասին ԱԺ-Կառավարություն հարցուպատասխանի ընթացքում հայտարարեց ՀՀ ԱԳ նախարարի պաշտոնակատար Արա Այվազյանը՝ անդրադառնալով պատգամավոր Սերգեյ Բագրատյանի հարցին։
Բագրատյանը հայտարարեց՝ ՌԴ-ն ունի պարտավորություններ՝ որպես հրադադարի երաշխավոր, իսկ ՀՀ քաղաքաացիները գտնվում են գերության մեջ՝ նոյեմբերի 9-ի համաձայնագրից հետո։ «Բոլոր գերեվարվածները պետք է վերադարձվեն իրենց երկրներ։ Ինչու՞ է Ադրբեջանը համարձակվում պահել գերիներին, Մինսկի խմբին էլ ասել, թե Արցախի հարցն այլև գոյություն չունի»,-հարցրեց պատգամավորը։
«Ադրբեջանը երկար ժամանակ պնդում էր, թե այլևս խոսք չի կարող լինել ԼՂ հակամարտության մասին, և հարցը լուծված է, պետք է Հարավային Կովկասում նոր շրջան սկսել»,-նշեց Այվազյանը։
Ինչ վերաբերում է գերիների վերադարձին, Այվազյանն ասաց, որ գերիների խնդիրն ուշադրության ներքո է։
«Պետք է գոհունակությամբ նշենք, որ ռուսաստանյան կողմի միջնորդությամբ արդեն 70 ռազմագերիներ և այլ քաղաքացիական անձինք ազատ են արձակվել։ Հարցը նաև միջազգային հանրության ուշադրության կենտրոնում է և դարձել է նաև Մինսկի խմբի համանախագահների օրակարգային հարց»։
